广州广州友谊商店
　　位于环市东路嘅广州友谊商店，每当夜幕降临，溢彩流光，几靓啵。

　　时光倒流二十年，嗰阵时嘅广州友谊商店就巴闭啰，喺上个世纪８０年代初，进口商品对一般广州市民有住好强嘅吸引力，而友谊商店又係广州少数可以买到进口商品嘅地方。

　　讲起广州友谊商店，有样嘢哩绝对係同佢有关嘅，就係外汇券。乜东东嚟嘅？佢係我国改革开放初期，由中国银行发行嘅一种替代外币喺中国境内流通，同人民币等值嘅人民币凭证。嗰阵时冇呢味嘢，你都唔使只易入去买嘢。

　　记得嗰阵时有华侨亲戚返嚟广州，喺佢带住去过友谊商店——门口。因为啱啱开始，一般人係唔能够入去嘅，所以亲戚攞住外国护照同外汇券入去买嘢，我就喺门口等啰。需然入唔到去，但係食到里面啲嘢，梗係开心啦。后嚟先至慢慢开放，只要有外汇券，就自由出入买嘢。

　　外父当年由于工作关系，唔单止好易有外汇券，仲可以经常出入友谊商店，买啲进口嘅糖果饼干、面包牛奶返屋企。我老婆嗰阵就有口福啰，经常有啲好嘢吃，搞到隔离左右啲细路仔细路女都唔知几羡慕。外父待人好好，嗰阵时嘅广州人，千方百计都谂住揾到几蚊外汇券嚟买啲进口货。外父会帮助啲亲戚，帮佢哋买啲嘢同埋换啲外汇券。

　　老婆一直都中意去友谊买嘢，嗰女啲用品啦，佢自己着嘅衫，买俾我嘅衫，最劲抽就係早期买咗部奥林巴斯嘅相机。我谂，佢除咗觉得友谊嘅商品好之外，对友谊似乎有住一种特殊嘅情结。可以讲友谊喺度伴随着一代人嘅成长，伴随住我哋生活嘅变化。即使係再过二十年，我谂，我哋嘅手中，仲会攞住友谊嘅发票。

　　识饮识食

　　无鸡不成宴，广州人对食鸡係情有独钟。逢年过节，请客食饭，冇鸡上枱，点见得人啊！广州以前出名嘅鸡有东江盐焗鸡、清平鸡、花雕鸡、九记路边鸡、太爷鸡等等，凡是饭店酒楼都有佢哋嘅拿手好鸡。一只鸡，广州人可以做到花样百出，食味不同。一煲老火汤，饮早茶，吃海鲜，外省人都学到十足啦。喺外省吃正宗粤菜係饮食时尚，价钱唔平。

　　食在广州，应该唔单止净係指粤菜，应该更加广义一啲。广州係一个包容、自古以嚟就係一个开放嘅城市，各种饮食文化都可以喺呢度揾到佢哋嘅踪影，各种唔同饮食文化喺呢度发扬光大。国外嘅有清真餐厅，阿拉伯民族嘅美食，越南菜、日本菜、泰国菜、韩国菜、西餐等；国内嘅有湘菜、川菜、东北菜；省内嘅有客家菜、潮州菜、顺德菜。广州已经成为以粤菜为主，包罗其它风格嘅一个美食天堂。除咗啲主打菜系之外，各地嘅美食都有云集广州，足不出广州，你都可以品尝到国内外嘅各种美食。

　　大家喺呢度以食会友，共享亲情，将民以食为天嘅内涵发挥到咗极致。每一个黄金周，每一个父母亲节，每一个情人节，餐厅食肆都会出现等位嘅情况，大家通过食嚟传达一份情感。广州人话斋：做嘢都係为咗揾两餐嗻，辛苦揾嚟自在食。广州人热爱生活，识得创造财富，所以识饮识食。

　　好味猪肠粉

　　广州人中食粥粉面，猪肠粉就係其中一样。猪肠粉可能係因为又长又圆碌碌啩？好似条猪肠咁样，所以广州人叫佢做猪肠粉。

　　食猪肠粉点样食都得，你可以净係用熟油加豉油捞住嚟食，又可以净係放辣椒酱，劲啲嘅咪牛腩猪肠粉啰，洒啲芝麻上去，食起身又够香，咁又得嘎，再唔係落啲蠔油或者鲍鱼汁。

　　以前小北路有间国营厂，专门生产粉类食品，其中就有猪肠粉嘞。嗰间厂是当街嘅，你行过都可以睇到工人喺度做紧嘢。厂房里边热气腾腾，嗰啲粉整到好大块，喺条半人工半机械嘅生产线度慢慢咁输送出嚟，有工人就对呢啲成品进行切分，其中就有人将佢卷成猪肠粉。当时呢间国营厂生意好旺嘎，普通市民排住队嚟买粉，买猪粉，仲有啲单位食堂、国营小食店、酒楼宾馆都有嚟攞货。我嗰阵时住喺小北路嘅大石街，阿妈落班就经常喺呢度买猪肠粉啰，因为佢知道我中意食吖嘛。

　　阿妈整猪肠粉，通常切成一碌碌，用盘装住，放喺镬入面隔水嚟蒸。蒸热咗之后就毕啲琼咗嘅猪油倒入猪肠粉，再倒入豉油一齐捞匀佢，咁就食得嘎啦。当啲猪油一倒入热气腾腾嘅猪肠粉即刻就会融化，猪油独特嘅香味同埋豉油香味就一齐随住猪肠粉嘅热气飘散出嚟，即时成间屋都香喷喷。面对住咁鬼香嘅猪肠粉，我会食到好猴急。其实猪肠粉放花生油都好香嘎，放猪油就更加香同埋有意思，猪油捞猪肠粉，双猪成趣。后嚟先至知道，其实猪油价钱平过花生油，原来阿妈係为咗悭钱先至放猪油嘅。

　　食猪肠粉，真係由细食到大。做细路哥嗰阵，婆婆食早餐就成日带我出去食猪肠粉，食完猪肠粉就去市场买餸。而家都有食猪肠粉，所唔同嘅係，而家讲究饮食健康，猪油改成粟米油，风味截然唔同晒。有快餐店推出珍珠肠粉，我以为係乜嘢新嘢，一睇，咪就係猪肠粉。唉，时代同生活都改变咗，猪肠粉都要与时俱进嘞。

　　相声古仔总相宜

　　一部半导体收音机，一段令人发笑嘅相声同埋古仔，伴随住我渡过咗唔少快乐嘅年少时光。嗰阵时屋企冇HI－FI，四个喇叭嘅收录机都係喺改革开放之后先至有，所以有部收音机就唔错啦。

　　当时张悦楷、林兆明、吴克、蔡传兴呢班讲古佬讲嘅古仔，同埋黄俊英、杨达讲嘅粤语相声我就最捧场嘞。好似用粤语播讲嘅《三国演义》、《西游记》、《水浒传》，听到人耳油都出啊。听佢哋讲古，最吊瘾就係“欲知后事如何，且听下回分解”。中午听唔到都唔紧要，俟晚仲有重播添。

　　冇收音机，我就抓住篼饭去隔篱屋听，去得多都唔好意思啦。老窦见我咁中意听，就去南方大厦买咗部收音机畀我，高兴到我弹晒起身。自从有咗收音机，我一放学就赶住返屋企，第一时间打开收音机等住听古仔。我一边食饭一边听，有时听到入晒神连食饭都停咗落嚟，阿妈就会闹我净係顾住听古仔唔食饭，饭餸都冻嘞。有时碰啱翻风落雨，电波信号唔係咁好，尽管咝哩沙嗱，一样听到津津有味。

　　而家好少听古仔啰，偶然间上网揾到个评书网站，一下子又勾起咗听古仔嘅冲动，于是单捞嚟听。而家好啰，中意行住路听又得，坐紧车听又得，冇晒约束，因为我用部音乐手机嚟听吖嘛。

　　旧机场与乘客

　　我屋企坐得飞机最多嘅就係老窦嘞，喺上个世纪六十年代到九十年代期间，佢经常坐飞机出差，真係乜嘢飞机都坐过，係旧白云机场嘅常客，白云机场噉多十年嘅变化佢都见过晒。

　　嗰阵，老窦坐飞机出差返嚟，我哋就好高兴啦，因为老窦会带返嚟坐飞机送嘅纪念品啦，当地嘅特产啦，仲有佢唔舍得食、留返嚟比我哋食嘅飞机餐。做细佬哥嗰阵有啲噉嘅嘢食，点会唔高兴吖。唉，真係可怜天下父母心。

　　嗰阵时坐三叉戟飞机就係好高级啦，老窦成日喺我哋面前赞三叉戟点好点好。后来坐咗波音飞机，三叉戟就失威嘞。

　　后来大个仔做嘢，我都坐过几次飞机出差。最觉得惊险嘅係，有一次出差去湖南长沙，夜晚黑喺旧白云机场起飞，坐嘅係前苏联制造、几十人嘅细飞机，一嘈二筛三震，历历嘞嘞都唔知係咪想散架。最劲抽一次係飞马来西亚吉隆坡，坐嘅係南航国际航班嘅波音客机，舒适得嚟空姐又靓。

　　以前嘅旧白云机场係属于军管嘅，有解放军守卫。而家嘅机场路就繁华一片，嗰阵时是一条好靓嘅林荫大道，通向候机楼。三元里机场立交附近就係进入旧白云机场嘅大门口，当时有一个好似牌坊噉嘅建筑物，有攞住枪嘅解放军把守，入去都要查你嘅证件。

　　而家，新白云国际机场有咗更靓嘅空中巴士，旧机场亦要进行改造，留喺我哋记忆当中嘅旧机场，又要迎嚟佢嘅新生嘞。

　　秉政街房客

　　细个嗰阵住喺中山四路秉政街，青砖墙瓦背顶木梁结构嘅公房住咗6家房客，大细老嫩成二十几人，够晒热闹。

　　热闹之一就係煮饭嗰阵，6家人共用一个厨房，有啲烧柴，有啲烧煤炉，有啲烧火水炉；汤粥嘅滚开声，炒菜嘅爆炒声，干柴燃烧嘅爆裂声；呢家喺度焖猪肉，嗰家煎紧咸水鱼，此起彼伏，直头係一曲厨房交响乐。热闹之二就係冲凉，冲凉房先得两个，冬天仲好啲，因为唔係人人晚晚都冲凉，夏天就恶搞嘞，吃完饭俟晚，家家都攞住个铁桶、木桶、面盘嚟排队，轮住嚟冲，你唔可以排一个队就成家冲晒，自觉啲，冲完一个要让畀下一家，如果唔係，实畀人闹。嗰阵冇热水器，冬天冲凉，家家都用个大锑煲嚟煲热水。噉嘅情景，而家广州仲有都罕见啦？而家单门独户，各自为政，讲究隐私，邻里之间串门都少啦，见到面最多打声招呼，倾两句。

　　成棚人住埋一齐，点都会有啲矛盾嘅，房客之间，两公婆之间就试过嗌交，我哋做细佬嘅就当热闹睇，大人就会出嚟劝交，嗌完第日照样打招呼，似乎冇乜隔夜仇。有时边家煮咗糖水，仲会畀啲隔篱屋嘅细佬食，嗰家包咗啲粽，又会整几只过嚟畀大家尝下，和睦气氛又再重现。休闲时，大人会聚埋喺阳台，讲下家常，谈天说地；细佬仔就穿家过屋，自由耍乐。

　　嗰阵时物质方面比较贫乏，但係大家充满住人情味，有一次我落街玩荡失路，啲房客全部出动四围去揾我，后嚟大个咗屋企人话番畀我听，真係令我感动。后嚟由于拆迁，呢度嘅房客就各散东西嘞。唉，我哋改变咗生活，生活又喺度改变紧我哋。

　　“广州旧事”共3页   当前第1页   转到>>  第2页   第3页